प्रदेश ५ मा कोरोना संक्रमण बढ्ने डर

१ असोज, बुटवल । प्रदेश ५ मा साउन १८ गते २३१ जना कोरोना भाइरसका सक्रिय संक्रमित थिए । क्वारेन्टिन र आइसोलेसन सेन्टरहरू खाली हुँदै थिए । तर भदौ २८ गते रातिसम्मको तथ्याङ्कले सक्रिय संक्रमित संख्या बढेर दुई हजार १२७ पुगेको देखायो ।

प्रदेशको सामाजिक विकास मन्त्रालयका अनुसार प्रदेशमा मंगलबारसम्म कुल संक्रमितको संख्या आठ हजार ३४९ पुगेको छ । प्रदेशका १२ वटै जिल्लामा सक्रिय संक्रमित छन् । कोरोना संक्रमणबाट मृत्यु हुनेको संख्या पनि ५० पुगेको छ । संक्रमण मुक्त हुने एकहप्ताअघिको औसत दर ७६ प्रतिशतबाट घटेर ३२ भदौमा ७३ प्रतिशतमा झरेको छ ।

पछिल्ला दिनहरूमा कडा लक्षण भएका संक्रमित बढेका छन् । प्रदेशको सामाजिक विकास मन्त्रालयका अनुसार २० प्रतिशतभन्दा बढी संक्रमितमा लक्षण देखिएका छन् । गर्भवती र डायलासिस गराइरहेका मिर्गौलाको बिरामीमा संक्रमण फैलिएको छ ।

प्रदेश सरकारले समुदायस्तरमा कोरोना फैलिएको घोषणा नगरे पनि धेरैजसो संक्रमित ट्राभल हिस्ट्री नभएका छन् । सुरुमा भारतलगायतका मुलुकबाट फर्केकाहरूमा देखिएको संक्रमण अहिले स्वास्थ्यकर्मी, सुरक्षाकर्मी र जनप्रतिनिधिसमेतमा फैलिएको छ ।

कोरोना संक्रमणको ‘हटस्पट’ बनेको रुपन्देही, बाँके, कपिलवस्तुलगायत जिल्लामा विद्यालय, ठूला होटेल र सार्वजनिक यातायातबाहेक सबै व्यवसाय र निजी सवारी साधन चलेका छन् । बजारमा चहलपहल बढेको छ । जनजीवन पुरानै अवस्थामा फर्केको देखिन्छ । तर स्वास्थ्य सुरक्षाका मापदण्ड कडाइपूर्वक पालना भएको देखिँदैन ।

जबकी, सोमबार साँझसम्म रुपन्देहीमा १८, कपिलवस्तुमा ८ र बाँकेमा ७ जना संक्रमितको मृत्यु भइसकेको छ ।

प्रदेश ५ का सामाजिक विकासमन्त्री सुदर्शन बराल दशैं–तिहारलगत्तै कोरोना संक्रमण बढ्ने जोखिम देखिएको बताउँछन् । साउन तेस्रो हप्ताको सुरुमा सक्रिय संक्रमितको संख्या घटे पनि त्यसपछि बढेर सेकेन्ड वेभ आएजस्तै दशैं–तिहारपछि संक्रमणको थर्ड वेभ (तेस्रो लहर)  आउने देखियो,’ उनले भने ।

चाडपर्वमा स्वाभाविक रूपमा बढ्ने मान्छेको जमघटलाई सरकारले बल प्रयोग गरेर रोक्न नमिल्ने र जाडो मौसम पनि सुरु हुने भएकाले भाइरस संक्रमण फैलिने जोखिम आकलन गरिएको मन्त्री बरालले बताए । ‘दशैं–तिहारपछि सक्रिय संक्रमितको संख्या पाँच हजार पुग्न सक्ने आकलन गरेर प्रतिकार्य योजना बनाएका छौं, उनले भने, ‘अब आईसीयू र आइसोलेसनको बेड संख्या २५–२५ सय पुर्‍याएर एकैपटक पाँच हजारको उपचार गर्ने तयारीमा छौं ।’

अहिले प्रदेश ५ का १२ जिल्लामध्ये सबैभन्दा धेरै जनसंख्या भएको रुपन्देही ‘रेडजोन’मा परेको छ । त्यसपछि क्रमशः कपिलवस्तु र बाँकेमा बढी संक्रमण देखिएको छ ।

कोरोना संक्रमितहरूमा श्वासप्रश्वास र निमोनियाको मुख्य समस्या देखिने गरेकाले उनीहरूलाई तत्काल आईसीयू बेडमा राखेर अक्सिजन दिएर उपचार गर्नुपर्ने हुन्छ । तर पर्याप्त आईसीयू बेड नहुँदा कतिपय संक्रमित उपचार नपाएरै मृत्युको मुखमा पुगेका छन् ।

प्रदेश ५ सरकारले सञ्चालन गरेका चारवटा कोरोना विशेष अस्पतालमध्ये धागो कारखानामा १६, भीम अस्पतालमा ५, बाँकेको खजुरामा ८ र दाङको बेलझुण्डीस्थित अस्पतालमा ५ गरी जम्मा ३४ वटा आईसीयू बेड छन् ।

लक्षण र अन्य स्वास्थ्य समस्यासहितका संक्रमित बढेसँगै सरकारले आइसोलेसन अस्पतालहरूको क्षमता र जनशक्ति बढाउने निर्णय त गरेको छ तर कार्यान्वयन कहिले हुने भन्ने बारे टुङ्गो छैन ।

प्रदेश सरकारले बुटवल धागो कारखानामा सञ्चालित कोरोना अस्पतालमा २० वटा आईसीयू बेड थप्ने निर्णय गरेको छ । त्यसपछि अक्सिजन आवश्यक पर्ने संक्रमितले तत्कालै उपचार पाउने सामाजिक विकास मन्त्रालयका सूचना अधिकारी डा. पुष्पराज पौडेलले बताउँछन् । त्यहाँ अहिले ३६ वटा आईसीयू बेड छ ।

त्यस्तै, भैरहवाको भीम अस्पतालमा १३ एचडीयू बेड, केन्द्रीय आयुर्वेद बेलझुण्डीमा १७ एचडीयू बेड र भेरी अस्पताल बाँकेमा आईसीयू ५ बेड र ३० एचडीयू बेड थप्ने सरकारले निर्णय गरेको छ ।

संक्रमितको उपचारमा खड्किएको अर्को मुख्य समस्या एनेस्थेसिया र कन्सल्टेन्ट फिजिसियनको अभाव हो । मन्त्रालयका सूचना अधिकारी डा. पौडेलका अनुसार अहिलेसम्म सरकारी अस्पतालका डाक्टर र कतै मेडिकल कलेजले अल्पकालीन रूपमा पठाएका डाक्टरबाट आईसीयू बेडमा भर्ना भएका संक्रमितको उपचार भइरहेको छ ।

मन्त्री बराल भन्छन्, ‘आईसीयू उपकरण र बेड त पैसाले किनेर थप्न सकिएला तर एनेस्थेसिया र कन्सल्टेन्ट फिजिसियनहरू आवेदन खोल्दा पनि आएका छैनन्, यो ठूलो समस्या भएको छ ।’

उनका अनुसार अहिले कम्तीमा ८ जना एनेस्थेसिस्ट र ३० जना एमडी गरेका कन्सल्टेन्ट फिजिसियन चाहिएको छ । त्यसका लागि दोस्रोपटक विज्ञापन गर्न लागेको उनले बताए । चारवटा कोरोना विशेष अस्पतालका लागि प्रदेश सरकारले ५८३ जना जनशक्ति नियुक्त गर्न र ती जनशक्तिलाई तीन महिनाका लागि तीन करोड ९६ लाख ३२ हजार रुपैयाँ तलबभत्ता निकासा समेत गरेको मन्त्री बरालले बताए ।

प्रमुख प्रतिपक्षी नेपाली कांग्रेसले कोरोना संक्रमण नियन्त्रणमा प्रदेश सरकार अकर्मण्य बनेको आरोप लगाउँदै आएको छ ।

कांग्रेस संसदीय दलका नेता वीरेन्द्र कनौडिया कोरोना नियन्त्रणमा प्रदेश सरकार पूरै दिशाहीन र योजनाविहीन देखिएको बताउँछन् ।

‘प्रदेश सरकारले ६ महिना गफ मात्रै गरेर बितायो’, उनी भन्छन्, ‘रोकथाम र उपचारको लागि सरकारले पाएको समय ठूलाठूला गफ गरेर बिताउँदा कोरोना संक्रमण नियन्त्रणभन्दा बाहिर जान थालेको छ ।’

प्रतिक्रिया :

भर्खरै प्रकाशित

२० देशमा भेटियो कोरोनाको नयाँ भेरियन्ट ‘ओमिक्रोन’, नेपालमा पनि थालियो…

काठमाडौं, १५ मंसिर । कोरोना भाइरसको नयाँ भेरियन्ट विश्वका विभिन्न २० देशमा देखिएको रिपोर्ट बाहिर आएको छ । दक्षिण अफ्रिकामा सबैभन्दा पहिला रिपोर्ट भएको यो भेरियन्टका…

सर्वोच्चमा आजदेखि गोलाप्रथा

काठमाडौं, १५ मंसिर । सर्वोच्च अदालतमा आज (बुधबार) देखि गोलाप्रथा प्रणाली कार्यान्वयन हुँदैछ । प्रधानन्यायाधीशको विशेषाधिकार अन्त्य गर्दै न्यायाधीशले नै गोला तानेर इजलास र पेसी तोक्ने अभ्यास…

प्रहरी नियमावली संशोधन : एकै पटक साढे १७ हजार प्रहरीको…

काठमाडौं, १५ मंसिर । प्रहरी नियमावली संशोधन गरेर सिर्जना गरिएका वरिष्ठ सइ, वरिष्ठ हवल्दार र सहायक हवल्दार पदमा एकैपटक १७ हजार पाँच सय १७ प्रहरी बढुवा…

एमसीसी जस्ताको त्यस्तै पास गर्ने पक्षमा छैनौं : नारायणकाजी श्रेष्ठ

पोखरा, ११ मंसिर । नेकपा माओवादी केन्द्रका नेता नारायणकाजी श्रेष्ठले अमेरिकी मिलेनियम च्यालेञ्ज कर्पोरेसन (एमसीसी) जस्ताको त्यस्तै पास गर्ने पक्षमा आफ्नो पार्टी नरहेको बताएका छन् ।…

सौराहामा एमाले महाधिवेशनको बन्द सत्र शुरु

चितवन, ११ मंसिर । नेकपा (एमाले) को १० औं राष्ट्रिय महाधिवेशन अन्तर्गतको बन्द सत्र सचितवन सौराहामा शुरु भएको छ । निर्धारित समयभन्दा धेरै ढिलो गरी बन्द…