दशैँका लागि ६ करोड रुपैयाँ बराबरको खसी–बोका ल्याउने तयारी

काठमाडौं । गत वर्षहरुमा जस्तै यसपाली पनि सरकारले उपत्यकावासीलाई दशैँमा सुपथ मूल्यमा खसी–बोका तथा च्याङ्ग्रा उपलब्ध गराउने भएको छ । सरकारी निकाय खाद्य व्यवस्था तथा व्यापार कम्पनीले यस पटक ६ करोड रुपैयाँ बराबरको खसी–बोका तथा च्याङ्ग्रा उपलब्ध गराउने भएको हो ।

यस पटक खाद्यले तीन हजार वटा खसीबोका तथा च्याङ्ग्रा ल्याउने तयारी गरेको छ । यसका लागि खाद्यले अनुमानित ५ करोड ९९ लाख ८६ हजार रुपैयाँ बजेट छुट्याएको छ ।गत वर्ष सोही परिमाणको खसी–बोका तथा च्याङ्ग्राका लागि कम्पनीले कुल ५ करोड ९८ लाख ८२ हजार रुपैयाँ बजेट छुट्याएको थियो । जसमा कम्पनीले १४०० वटा खसी–बोका र १६०० वटा च्याङ्ग्रा ल्याएको थियो ।
यस वर्ष पनि उपत्यकावासीलाई सोही परिमाणमा खसी–बोका र च्याङ्ग्रा उपलब्ध गराउने गरी चालु आर्थिक वर्षको बजेट पारित गरिएको खाद्य व्यवस्था तथा व्यापार कम्पनीका नायव प्रवन्ध निर्देशक श्रीमणि खनालले रातोपाटीलाई बताए ।

लामो समयदेखि खाद्य कम्पनीले उपभोक्तालाई खाद्यान्नका साथै दशैंमा सुपथ मूल्यमा खसी–बोका तथा च्याङ्ग्रा समेत उपलब्ध गराउँदै आएको छ । यस पटक पनि सोही कार्यक्रमलाई निरन्तरता दिन लागिएको नायव प्रवन्ध निर्देशक खनालको भनाइ छ ।

यस पटक कात्तिकमा दशैं परेका कारण खाद्यले खसी–बोका पनि ढिलै ल्याउने तयारी गरेको छ । प्रायः घटस्थापनाको अघिल्लो दिन काठमाडौंमा खसी–बोका ल्याउने खाद्यले यस पटक पनि सोही दिनलाई टार्गेट गरेर योजना बनाइरहेको खाद्य कम्पनीका सूचना अधिकारी शर्मिला न्यौपाने अधिकारीले बताइन् । तर खरिद तथा संकलन प्रक्रिया भने १५ दिन अघिदेखि नै हुने न्यौपानेको भनाइ छ ।

न्यौपानेका अनुसार दाङ, तुलसीपुर, हेटौंडा र नेपालगञ्ज लगायतका स्थानबाट काठमाडौंमा खसी–बोका ल्याउने गरिएको छ । तर च्याङ्ग्रा भने मुस्ताङबाट ल्याइने उनले बताइन् । यस वर्ष सम्भव भएसम्म नजिकका क्षेत्रबाट ल्याउने, नभए तिनै क्षेत्रबाट भए पनि खसी–बोका तथा च्याङ्ग्रा ल्याउने उनको भनाइ छ । 

गत वर्षको तुलनामा मूल्यमा खासै फरक नपर्ने
बर्षेनी दशैंमा उपभोक्ताहरुलाई सूपथ मूल्यमा खसी–बोका तथा च्याङ्ग्रा उपलब्ध गराउँदै आएको खाद्यले गत वर्षको तुलनामा यस वर्ष मूल्यमा खासै फरक नपर्ने बताएको छ । 
कोभिड–१९ कै बीच पनि संकलन र ढुवानीमा समस्या नपर्ने र खाद्य आफैले कृषकको घरघरबाट खसी–बोका संकलन गर्ने हुँदा महँगो नपर्ने सूचना अधिकारी न्यौपानेले रातोपाटीलाई बताइन् । तर अहिले नै खरिद नभइसकेकाले के कति पर्ने हो सो भने अहिले नै यकिन गर्न नसकिने उनको भनाइ छ ।

त्यसो त खसी–बोकाको मूल्य सो क्षेत्रका प्राथमिक खरिद–विक्री मूल्य निर्धारण समितिले निर्धारण गरिसकेपछि मात्र खाद्यले खरिद गर्ने गर्छ । उक्त समितिमा उत्पादक कृषकदेखि सम्बन्धित जिल्लाको प्रमुख जिल्ला अधिकारी र सरोकारवाला निकायहरुका प्रतिनिधिहरु रहने गर्छन् । यस पटक सो समितिले मूल्य निर्धारण नगरिसकेकाले बजार मूल्य यकिन नभएको न्यौपानेको भनाइ छ । उपभोक्ताले तोकेको मूल्यमा बाटो खर्च र विविध व्यवस्थापन खर्च समेत जोडेर बजार मूल्य निर्धारण गर्ने गरिएको छ ।

गत वर्ष खाद्यले खसी–बोका प्रतिकेजी ५ सय ६० रुपैयाँ र च्याङ्ग्रा प्रतिकेजी ७ सय ४० रुपैयाँमा उपभोक्ताहरुलाई उपलब्ध गराएको थियो, जुन बजार मूल्यभन्दा प्रतिकेजी १०–१५ रुपैयाँसम्म सस्तो थियो ।

व्यापारमा कोभिड–१९ ले समस्या नपार्ने दावी
हाल मुलुकमा कोभिड–१९ को प्रकोप बढे पनि परापूर्वकालदेखि मान्दै आएको संस्कृतिका कारण दशैंको साख नघट्ने खाद्यको बुझाइ छ । सोही कारण बजारको माग र पूर्तिमा समेत कमी नहुने खाद्यका नायव प्रवन्ध निर्देशक श्रीमणी खनाल बताउँछन् ।

‘खाद्यको २० वर्षभन्दा लामो इतिहासमा उपभोक्ताहरुलाई विशेष चाडवार्डको अवसरमा विशेष छुटसहितको सुपथ मूल्यको पसल तथा खसी–बोका उपलब्ध गराउँदै आएको छ । त्यो यस वर्ष पनि जारी रहने छ,’ नायव प्रवन्ध निर्देशक खनालले भने, ‘कोभिडका कारण मुलुकमा समस्या भए पनि परापूर्वकालदेखि मान्दै आएको धर्म–संस्कृतिमा विचलन आउने देखिँदैन । त्यसैले यस पटक पनि हामीले उपभोक्ताहरुलाई सुपथ मूल्यमा उपभोग्य वस्तु उपलब्ध गराउने कार्यक्रमलाई जारी राख्ने योजना बनाएका छौं ।’

त्यसो त असहज परिस्थितिमा पनि खाद्यान्न, खसी–बोका तथा च्याङ्ग्राको संकलन, ढुवानी तथा विक्रीवितरणमा समस्या नआउने खाद्यको अनुमान छ । दशैंकै लागि भनेर खाद्यले यस पटक दाल, चामलका साथै जुम्लाको सिमी र तेलको समेत व्यापार बढाउने योजना बनाएको छ । तर दशैं लक्षित सुपथ मूल्यका पसलहरु भने कति र कहाँकहा राख्ने भन्ने यकिन भइनसकेको सूचना अधिकारी न्यौपानेले रातोपाटीलाई बताइन् ।

प्रतिक्रिया :

भर्खरै प्रकाशित

यी चार प्रदेशमा ठूलो वर्षाको सम्भावना, पहाडी र हिमाली क्षेत्रमा…

काठमाडौँ – आज प्रदेश १, प्रदेश २, बागमती, र गण्डकी प्रदेशका एक दुई स्थानमा ठूलो वर्षाको सम्भावना रहेको छ। मौसम पूर्वानुमान महाशाखाकाअनुसार हाल प्रदेश १,…

शिक्षक सेवा आयोगको नियमावली संशोधन प्रस्ताव ल्याउन निर्देशन

कात्तिक ३, काठमाडौँ । शिक्षा, विज्ञान तथा प्रविधिमन्त्री देवेन्द्र पौडेलले शिक्षक सेवा आयोगको नियमावली, २०५७ (नवौँ संशोधन), २०७१ मा आवश्यक संशोधन गरी शिक्षक पदपूर्तीको प्रक्रिया…

राप्रपा लुम्बिनी प्रदेशद्वारा कृषकलाई तत्काल क्षतिपूर्ति दिन माग

कार्तिक ३, बुटवल । लगातारको वर्षाले धानबालीमा भएको क्षति पुगेकोले राष्ट्रिय प्रजातन्त्र पार्टी (राप्रपा) लुम्बिनी प्रदेशद्वारा कृषकलाई तत्काल क्षतिपूर्ति दिन माग गरेको छ । कृषकलाई…

ट्वान्टी-२० विश्वकप :बंगलादेशले ओमानलाई २६ रनले हरायो

कार्तिक ३, काठमाडौँ । बंगलादेशले मंगलबार आयोजक ओमानलाई २६ रनले पराजित गर्दै ट्वान्टी–२० विश्वकपको सुपर १२ मा पुग्ने आशा जीवितै राखेको छ । विजय हात पार्न…

दुई महिनामै २१.५ प्रतिशत घट्यो सेयर

कार्तिक ३, काठमाडौँ । काठमाडौँ — गत भदौ २ मा सेयर कारोबार मापक नेप्से परिसूचक हालसम्मकै उच्च अंक ३ हजार १ सय ९८ मा पुग्यो ।…